Hindi naging matagumpay ang ilang sikat na personalidad mula sa industriya ng showbiz sa katatapos lamang na halalan nitong 2025. Ipinakita ng resulta ng botohan na tila mas pinahahalagahan na ngayon ng mga botante ang karanasan at konkretong plataporma sa pamumuno, kaysa sa popularidad ng isang kandidato.

Isa sa pinakakilalang natalo ay si Luis Manzano, anak ng dating aktres at dating gobernador ng Batangas na si Vilma Santos. Tumakbo si Luis bilang bise gobernador ng Batangas ngunit bigo siyang makuha ang posisyon matapos talunin ng incumbent na si Dodo Mandanas, na may halos 200,000 na lamang sa bilang ng boto.

Sa lungsod ng Makati, parehong natalo ang dalawang personalidad na sina Victor Neri at Monsour del Rosario na kapwa tumakbo sa mas mataas na puwesto bilang alkalde at bise alkalde. Sa parehong lungsod, ipinakita ng mga botante ang kagustuhang mapanatili ang mga lokal na lider na may mas matibay umanong karanasan sa pamamahala.

Sa rehiyon ng Visayas, hindi rin pinalad si DJ Durano na manalo bilang alkalde ng bayan ng Sogod sa Cebu. Samantala sa Luzon, hindi rin nanalo si Arnold Vegafria—isang kilalang talent manager—nang sumabak siya sa politika bilang kandidato sa pagka-alkalde ng Olongapo City.

Kasama rin sa listahan ng mga natalo sa halalan ang ilang personalidad na tumakbo bilang bise alkalde. Kabilang dito sina Angelika dela Cruz sa Malabon, Anjo Yllana sa Calamba, Laguna, at Yul Servo sa Maynila. Sa kabila ng kanilang kasikatan, hindi naging sapat ito upang sila’y maipanalo sa kani-kanilang lungsod.

Hindi rin pinalad si dating PBA star na si Vergel Meneses na makabalik sa posisyon bilang alkalde sa isang bayan sa lalawigan ng Bulacan. Bagamat may karanasan na sa pamahalaan, tila mas pinaboran ng mga botante ang ibang kandidato.

Samantala, maraming kilalang personalidad mula sa entertainment industry ang tumakbo bilang konsehal ngunit nabigo ring manalo. Ilan sa kanila ay sina Ara Mina at Shamcey Supsup sa Pasig; Enzo Pineda at Ali Forbes sa Quezon City; Aljur Abrenica sa Angeles City; Abby Viduya at Ryan Yllana sa Parañaque; at sina David Chua, Bong Alvarez, at Mocha Uson sa Maynila.

Sa senatorial race naman, hindi rin naging matagumpay ang mga celebrity candidates gaya nina Ben Tulfo, Bong Revilla, Jimmy Bondoc, Manny Pacquiao, Phillip Salvador, at Willie Revillame. Hindi sila nakapasok sa Top 12 na posisyon.

Bagamat talunan, marami sa kanila ang nagpahayag ng pasasalamat sa suporta ng kanilang mga tagasuporta. Nangako silang ipagpapatuloy ang kanilang mga layunin at adbokasiya sa ibang anyo ng serbisyo publiko kahit wala sa puwesto.

Ayon sa mga tagamasid sa larangan ng pulitika, nagsisimula nang maging mas mapanuri ang mga botante sa pagpili ng kanilang mga lider. Hindi na sapat ang kasikatan sa telebisyon o social media upang manalo. Mas hinahanap na ngayon ng taumbayan ang mga kandidatong may konkretong plano para sa bayan, at may tunay na karanasan sa pamamahala.

Ang resulta ng halalan ay nagsisilbing mensahe sa mga nagnanais tumakbo sa politika—na ang serbisyo publiko ay hindi lamang tungkol sa pangalan, kundi sa tunay na kakayahan at malasakit sa mamamayan.